Ku-Simaha Guddoomiyaha Ahna Guddoomiye Ku-xigeenka koowaad ee Aqalka Sare ee Baarlamaanka Jamhuuriyadda Federaalka Soomaaliya Mudane Cali Shacbaan ibraahim ayaa maanta xafiiskiisa Kulan kula qaatay khubro ka socday dalka Talyaaniga oo kala ah Dr. Ahmed Faghi Elmi oo ka tirsan Golaha deegaanka Magaaladda Trieste ee wadanka Talyaaniga oo ay la socdeen Prof. Federico Battera iyo Prof. Federico Donelli oo ka socday Jaamacadda Trieste qaybteeda siyaasadda iyo Cilmiga Bulshada.
Ujeedka kulanka ayaa ahaa sidii labada dowladood ay iskaga kaashan lahaayeen tayada waxbarashada jaamacadaha ee labada dal, iyagoo tilmaamay muhiimada iskaashigaan uu u leeyahay Jaamacadaha dalkeenna iyo dalka Talyaaniga sidoo kale waxay labada dhinacba isla qateen sidii ay ardayda Soomaaliyeed u heli lahayeen waxbarasho tayo leh isla markaana dowlada Talyaaniga ay ka taageeri laheeyn.
Ku-Simaha Guddoomiyaha ahna Guddoomiye kuxigeenka koowaad ee Aqalka Sare ayaa khubarada uga mahadceliyey booqashada ay ku yimadeen Soomaaliya, dhanka kale Guddoomiyaha ayaa bogaadiyay xidhiidhka soo jireenka ah ee ka dhexeeya Soomaaliya iyo Talyaaniga kaalinta Dowladda Talyaaniga ee horumarinta Soomaaliya.
